მერისობა

,,მერისობა" სახალხო დღესასწაულია, რომელსაც მერისის თემში შემავალი სოფლების მოსახლეობა აღნიშნავს და 2008 წლიდან ტარდება ხუთ წელიწადში ერთხელ. ზეიმზე წარმოდგენილია: ფოლკლორული, ეთნოგრაფიული და ხალხური რეწვის ნიმუშები, იმართება სასოფლო-სამეურნეო პროდუქტების გამოფენა. ტრადიციულად ვლინდება საპატიო მერისელი, რომელიც სხვადასხვა პრიზით ჯილდოვდება.  

ამ დღეს მთელი მერისი იკრიბება, ისინიც ამოდიან, ვინც მერისში აღარ ცხოვრობენ სხვა სტუმრებთან ერთად და თითქოს ანგარიშს აბარებენ მშობლიურ ხეობას. ზეიმზე მოსულებს  შეუძლიათ დატკბნენ ამ ხეობის უმშვენიერესი და ულამაზესი ხედებით, დააგემოვნონ უგემრიელესი და უნიკალური  ადგილობრივი ღვინოები ჩხავერი და ცოლიკაური. მოისმინონ ნელი ფერხულით ნამღერი „ჩაღმა ჩაყრილო ვენახო“ „ხინწკალა“ და  სხვა მერისული ფოლკლორული შედევრები და ისიამოვნონ.

 დღესასწაულზე დასასწრებად მოსულ სტუმრებს შესაძლებლობა აქვთ ასევე მოინახულონ  ქედის ეთნოგრაფიული მუზეუმი და მერისის   ჩანჩქერი.

ჩატარების ადგილი: ქედის მუნიციპალიტეტი, მერისის თემი